A razón de ser deste blogue é fundamentalmente publicar poesía, tanto en galego como en castelán. Pero se irán incorporando tamén algún que outro relato e textos de carácter ensaístico.
“Abrentes” significa algo así como “amenceres”. Parece inevitable asociar o seu sentido, por metáfora fácil, co termo “esperanza”. Algo diso hai, pero non no seu significado máis trivial, senón neste: “esperanza” remite etimoloxicamente -latín mediante- ao indoeuropeo *spē- (expandirse); e, polo tanto, refírese a un movemento que tende a crecer progresivamente. O termo “abrentes”, pola súa banda, deriva do participio de presente de ‘abrire’, relativo, por conseguinte, a un movemento temporal de apertura. Abrente é o movemento da luz que vai abríndose paso no medio da escuridade.
O autor deste blogue chámase Rodrigo Varela. É profesor de lingua castelá e literatura. Escribe dende as marxes, aproveitando a lene luz que se filtra no umbral…
Nota sobre formatos: Como temos comprobado que as pausas versais non se poden manter de forma rigorosa no texto dixital, no caso dos poemas decidimos ofrecer un arquivo descargable en .pdf para que as persoas que teñan interese poidan coñecer o texto na súa versión definitiva.